၂၀၂၁ ဇူလှိုင် ၁၇ စနေနေ့ ၄ နာရီကနေ ၆ နာရီအထိ ကိုလံဘတ်အဝိုင်း စန်ထရယ်ပါ့ခ်ပန်းခြံမှာ အာဇာနည်နေ့ဆန္ဒပြပွဲရှိတယ်။ ဆန္ဒပြပွဲမတိုင်ခင် မိုးတွေသည်းသည်းမည်းမည်းရွာလို့ လူနည်းမယ်လို့ထင်တာတာ လူများသား။ အဖြူရောင်အင်္ကျီဝတ်ခဲ့ပါဆိုလို့ မိုးကာအင်္ကီျချွှတ် အဖြူရောင်ဆွယ်တာထပ်ဝတ် Zara ကိုပြန်ပေးမဲ့အင်္ကီျထုပ်နဲ့ဆိုတော့ ဗြောင်းဆန်နေတာ လက်မောင်းမှာ အမည်းရောင်အဝတ်စည်းပတ်တော့ ကူညီတတ်တဲ့အန်တီကြီးက ကူတပ်ပေးတယ်။ အမည်းရောင်အဝတ်စပြုတ်ကျမှာမို့လို့ ချိတ်နဲ့အသေအချာ တွယ်ပေးတယ်။ သူများတွေ ပန်းကိုင်ထားတာတွေ့လို့ မေးကြည့်တော့ အဓိပ္ပာယ်တခုခုရှိတယ် သူလည်းမသိဘူးတဲ့။ပန်းအဝါရောင်လေးတွေလာပေးတော့ ဘေးကကောင်လေးကို ယူမလားမေးတော့ ခေါင်းခါပြတယ်။ မိုးတိတ်နေပြီ ထီးမကိုင်ထားချင်ရင် စင်နားမှာသွားထားလို့ရတယ်လို့ ပြောတော့လည်း ခေါင်းခါပြတယ်။ ဆန္ဒပြတဲ့သူအများစုက ပွဲတိုင်းပါလို့ မှတ်မိနေပြီ။ ရှေ့ဆုံးတန်းက အစ်မလေးက ချောချောလေး အမြဲရှေ့ဆုံးတန်းက ချီတက်တယ်။ ဘာသာပေါင်းစုံက ခေါင်းဆောင်တွေက မေတ္တာပို့အမျှဝေတယ်။ ကြွေးကြော်သံတွေ အော်ဟစ်ပြီး အာဇာနည်ခေါင်းဆောင်တွေကို လွမ်းသူပန်းတွေချဖို့ တယောက်ချင်းတန်းစီထွက်တော့မယ်ဆိုမှ ဘေးနားကကောင်လေးက ပန်းတောင်းတယ်။ ဒုတိယအကြိမ် တရုတ်သံရုံးဆန္ဒပြပွဲမှာ သိလာတဲ့ အန်တီကြီးကိုတွေ့တယ်။ သူလည်း ပွဲတိုင်းလာတယ် လက်သီးလက်မောင်းတန်းနေတာပဲ။ စက်ဝိုင်းပုံဝိုင်းလိုက်ပြီး ကဗျာရွတ်တာ နားထောင်တယ်။ CDM ဝန်ထမ်းတွေ အကူအညီတောင်းလို့ သူရဲကောင်းတွေအတွက် အလှုငွေကောက်ပါတယ်။ လက်ခံငွေဖြတ်ပိုင်းပေးတာ၊ လက်ခံရရှိကြောင်း အီးမေးလ်ပို့ပေးပါမဟုတ်လို့ စိတ်ပြတ်မှလှုပါတဲ့။ Cash ငွေသား မပါရင် Zelle နဲ့လှုလို့ရပါတယ်တဲ့။ အလှုငွေ တထောင်ကျော်ရရှိပါတယ်။ ပြီးတော့ လမ်း၈၀အထိ ချီတက်ကြွေးကြော် ဆန္ဒပြကြတယ်။ ပြတိုက်ရှေ့မှာအဆုံးသတ်ပြီး အုပ်စုဓာတ်ပုံရိုက်မယ်ဆိုတော့ ပြတိုက်ရှေ့ရပ်လို့မရဘူးတဲ့ လုံခြုံရေးကတားတယ်။ ဟိုတခေါက်က ပြတိုက်ရှေ့မှာ ဓာတ်ပုံရိုက် တော်တော်ကြာတဲ့အထိ နေကြတယ်။ ဩဂုတ် ၈ ရက်နေ့ ဝါရှင်တန်ဒီစီမှာ ချီတက်ပွဲရှိတယ် နယူးယောက်ကနေ ဘတ်စ်ကားစီစဉ်နေတယ်တဲ့။ အန်တီကြီးက ဒီစီချီတက်ပွဲကိုသွားမယ်တဲ့ ကိုယ်လည်း အရင်ပွဲတွေက မသွားဖြစ်တော့ ခုပွဲကိုသွားမယ်လို့ စိတ်ကူးထားတယ်။ အရင်တုန်းက လမ်းသိပ်မလျှောက်နိုင် ဒီစီကို ဘတ်စ်ကား အသွား ၅ နာရီကျော်၊ အပြန် ၅ နာရီကျော်၊ ဆန္ဒပြချီတက်တာ ၃ နာရီဆိုတော့ အတော်ပင်ပန်းမှာ။ ခုတော့ လမ်းနည်းနည်းလျှောက်နိုင်လာပြီ အသိအန်တီကြီးကပါသွားမယ်ဆိုတော့ အားတက်သွားတယ်။
Photo credit - Wayne Chin, Kyaw Soe Latt, Terry Win
အရေးတော်ပုံ အောင်ရမည်!!!
စန်းထွန်း
ဩဂုတ် ၁၃၊ ၂၀၂၁။
 |
| မမီးက ကိုယ့်ပုံဝါးဝါးလေးကို မြင်တာနဲ့ မှတ်မိတယ်... |
 |