ဗော်လန်တီယာလုပ်တာ ပင်ပန်းတာမို့လို့ နောက်တကြိမ်၂၀၂၁ ဇူလှိုင် ၄ တနင်္ဂနွေနေ့ နယူးဂျာစီဘုန်းကြီးကျောင်းပွဲကို ကားကြုံလည်းမရှိလို့ ဗော်လန်တီယာမလုပ်တော့ဘူးလို့ တွေးထားတယ်။ ဗော်လန်တီယာစီစဉ်တဲ့အဖွဲ့က အတော်စနစ်ကျတယ်။ ဗော်လန်တီယာအလုပ်မှာ နှစ်သက်တာ၊ မကြိုက်တာ၊ အကြံပြုချင်တာလေးတွေ ပေးဖို့ survey link ရတယ်။ ဗော်လန်တီယာခေါင်းဆောင် အဆင်ပြေရင် ဗော်လန်တီယာလုပ်မလား ကားစီစဉ်ပေးမယ်ဆိုတာနဲ့ ဗော်လန်တီယာ လုပ်ဖြစ်သွားတယ်။ အိမ်နဲ့နာရီဝက်လောက်ဝေးတဲ့ ပန်းခြံမှာ မနက် ၇ နာရီ လာကြိုတယ်။ ဗော်လန်တီယာတွေအတွက် အင်္ကျီပေးတယ်၊ ဘာတွေလုပ်ရမယ်ဆိုတာ အဖွဲ့လိုက်ညွှန်ကြားပေးတယ်၊ မနက်စာကျွှေးတယ်။ ပွဲက ၁၂ နာရီ ၃ နာရီအထိ။ မနက် ၁၀ နာရီလောက်ရောက်တော့ တဲတွေထိုးပြီးနေပြီ။ စားပွဲခုံတွေခင်း၊ ဆိုင်နံပါတ် ဆိုင်းဘုတ်တွေကပ်၊ hand sanitizer တွေချ၊ vendor ဈေးရောင်းမဲ့သူတွေရဲ့ ပစ္စည်းတွေကို ကူချပေး၊ လိုအပ်တာချပေး။ မနက် ၁၁ နာရီနဲ့တင် ဗိုက်ဆာနေပြီ ရောင်းတဲ့ဆိုင်ကနေ ဝယ်ချင်တာဝယ်ပြီး အိတ်ထဲထည့်။ ဟိုတခေါက်ကလို ပြိုက်ခနဲမကုန်အောင် ၁၂ နာရီမှ ဈေးရောင်းရမယ်တဲ့။ ၁၁ ခွဲမှာ ဗော်လန်တီယာတွေကို ရောင်းခွင့်ပြုတယ်။ ကိုယ်တို့အဖွဲ့က အစ်မတယောက်ဆို ဝယ်တာများ အိတ်ကြီး၂အိတ်အပြည့်။ အစ်မနဲ့တင် တော်တော်ရောင်းကုန်နေပြီလို့စတော့ သူ့သူငယ်ချင်းတွေ မှာတာရောတဲ့။ ဇူလှိုင် ၄ အမေရိကန်လွတ်လပ်ရေးနေ့ပိတ်ရက်ဆိုတော့ ခရီးတွေသွားကြတဲ့အချိန် ပန်ဆယ်ဗေးနီးယားပြည်နယ် ပါချုပ်ဆရာတော်ပွဲမှာလည်း ဈေးရောင်းပွဲရှိတော့ ပန်ဆယ်ဗေးနီးယားဖက်ကလူတွေက နယူးဂျာစီပွဲကို မလာကြတော့ ခါတိုင်းထက်လူနည်းတယ်။ ဒီတခါကိုယ်က ဇွန်း၊ ခက်ရင်း၊ တစ်ရှူး၊ ပန်းကန်ပြား၊ ပန်းကန်လုံး ကောင်တာမှာ တာဝန်ကြတယ်။ လူတယောက်က ဘာရောင်းတာလဲလို့ အသေအချာကြည့်နေလို့ free free အော်ပြီး ရယ်လိုက်ရတာ။ လာနော် တစ်ရှူးတွေရမယ် ဇွန်းတွေရမယ် ပန်းကန်ပြားတွေရမယ် အလကားနော်။ ဘေးကဈေးဆိုင်တွေက ဘာမှမအော်ဘူး ကိုယ်တွေက အသားကုန်အော်ရောင်းနေတာ။ ဟိုတခေါက်က အလှုခံလက်ခံ ငွေသိမ်းကောင်တာက အန်တီကြီးနှစ်ယောက်က ခုပွဲမှာလည်း ငွေသိမ်းကောင်တာထိုင်တယ်။ ပွဲတိုင်းပါတဲ့သူတွေဆိုတော့ သိနေကြပြီ။ သံအမတ်ကြီး ဦးကျော်မိုးထွန်းက ပွဲတိုင်းလာတယ်။ သံအမတ်ကြီးနဲ့ ဓာတ်ပုံရိုက်ကြတာ ဝိုင်းဝိုင်းလည်။ တကူးတက သွားမရိုက်ဖြစ်တာ ဒီတခါတော့ ဗော်လန်တီယာခေါင်းဆောင်က ဗော်လန်တီယာတွေနဲ့ရိုက်မယ်ဆိုတော့ ပြေးမလွတ်တော့ဘူး။ ဗော်လန်တီယာတွေ ဖရဲသီး၊ ရေခဲချောင်းကျွှေး ပြန်ခါနီး ထမင်းဟင်းဘူးတွေပေးတယ်။ ဈေးဆိုင်တွေကလည်း ပိုတာတွေကို ဗော်လန်တီယာတွေအတွက် လာပေးတယ်။ ပွဲပြီးသွားတော့ တဲတွေ ခုံတွေသိမ်း ပစ္စည်းတွေ မြေအောက်ခန်းထဲပို့ အတော်ပင်ပန်းတယ်။ ဈေးရောင်းရငွေ ဒေါ်လာ ၄၅,၀၄၅ ရတော့ ပင်ပန်းပေမဲ့ တတ်နိုင်သလောက်လေး လုပ်ပေးတယ်ဆိုပြီး ပီတိဖြစ်ရပါတယ်။
Photo credit - Wayne Chin, Kyaw Soe Latt, Terry Win
အရေးတော်ပုံ အောင်ရမည်!!!
စန်းထွန်း
ဩဂုတ် ၇၊ ၂၀၂၁။
