စိုက်ပျိုးခြင်း အနုပညာ…

ပြောတော့ဖြင့် အငြိမ်းစားယူရင် အပင်လေးတွေ စိုက်စားမယ်ဆိုပြီး မြက်နဲ့ကြက်သွန်မြိတ်ပင်ကိုတောင် မခွဲတတ်ဘူးဆိုတော့ ဘယ်လိုလုပ်ကြမလဲ။ ဒီအိမ်မှာ နှစ်နှစ်ကျော်ပြီ နွေရာသီဆိုရင် တလတခါ အိမ်ရှေ့လမ်းမက အပင်တွေနှုတ် မြက်တွေရိတ်ပေးတယ်။ တလောက ငှက်စာကျွှေးတဲ့ခွက် လေတိုက်လို့ ပြုတ်ကျပြီး ကွဲသွားတယ်။ အဲ့ဒီတော့ ခေါင်းရင်းက အဆောင်အောက်မှာ ငှက်စာကျွှေးရင်း အပင်တွေကို ကြည့်မိတယ်။ အသီးတွေတော့ သီးပါရဲ့ ဘာအပင်မှန်းမသိဘူး။ တလောကလည်း ပန်းပွင့်နေတဲ့အပင်ကို မြက်ပင်ထင်ပြီး ခုတ်လိုက်တာ အိမ်ရှင်က အဲ့ဒါ ၈၀ တောင် ပေးရတဲ့ ဒေလီယာပန်းပင် နောက်မခုတ်နဲ့တဲ့။ မခိုင်လာတော့ အပင်တွေကိုကြည့်ပြီး ဒီအသီးက တည်သီးစားလို့ရတယ်၊ အဲ့ဒီအပင်က chives၊ ဒါက ပူစီနံတဲ့။ chives တွေကို မြက်ပင်ထင်ပြီး နှုတ်ပစ်နေတာ ပူစီနံနဲ့တူတယ်လို့တော့ ထင်သား။ အပင်မှာ အပွင့်လေးတွေပွင့်နေလို့ အဖေတို့ကို ဘာအပင်လဲလို့ ဓာတ်ပုံပြပြီးမေးတော့ ဥ◌ီးလေးတယောက် စိန်ပန်းပင်တဲ့။ နောက်တော့မှ ခရမ်းခဆော့သီးပင် ဖြစ်နေတယ်။ ခူးစားမလို့ဟာ အသီးတွေက မည်းနေလို့ မခိုင်က မစားပါနဲ့သမီးရယ် ဘာသီးတွေမှန်းမသိဘူးတဲ့။ မခိုင် ပြောတော့မှပဲ ခေါင်းရင်းကတည်သီးပင်ကို သွားသွားကြည့်တယ်။ ဝါလာရင်ခူးပြီး အုပ်ထားတယ် စားလို့မကောင်းဘူး ဖန်တန်တန်နဲ့။ အသီးတွေကို တနေ့တနေ့ သွားကြည့်တာအမော။ ဝါလာရင် ငှက်၊ ရှဥ◌့်တွေနဲ့အပြိုင် လုခူးတယ်။ ခုတော့ စားမကောင်းလို့ မခူးတော့ဘူး။ မနက်တိုင်း ငှက်ကလေးတွေကို အစားကျွှေးတယ်။ မနက် ၈ နာရီခွဲ ကိုယ်အစားကျွှေးတဲ့အချိန်ဆိုရင် ကျွှတ်ကျွှတ်ညံနေကြပြီ။ ကိုယ်ထွက်လာရင် ဘယ်သူရေ ဘယ်ဝါရေ ဒီမှာအစာကျွှေးနေပြီ သူ့ဘော်ဒါကို လှမ်းခေါ်ကြလေသလား မသိဘူး။ တချို့ငှက်က မကြောက်ဘူး ကိုယ့်အနားအထိ ပျံဝဲပြီးကြိုတယ်။ ရုံးပိတ်ရက် အိပ်ယာထနောက်ကျပြီး ကျွှေးရမဲ့အချိန် မကျွှေးရင် ကျွှတ်ကျွှတ်ညံနေကြပြီ။ အံမယ် … ငှက်တွေက အစားကျွှေးတဲ့သူနေတဲ့ အခန်းကိုသိတယ်တဲ့။ ရေလောင်းတာများလို့ သေသွားတဲ့ ZZ အပင်ကို အပြင်မှာထုတ်ထားတာ ပြန်ရှင်လာတယ် သေရွာပြန်ပင်။ စံပယ်ပင်ကတော့ သုံးနှစ်လောက်ရှိပြီ သေလိုက်ရှင်လိုက်နဲ့ အပွင့်လုံးဝမပွင့်ဘူး။ သစ်ခွခရမ်းရောင်လေးက သုံးခါလောက်ပွင့်ပြီး ကြက်ဥရည်တွေလောင်းတာ များသွားလို့ သေသွားတယ်။ ယုဇပင်ကတော့  အားအရဆုံးပဲ အတော်ပွင့်တယ် ပွင့်ရင်မွှေးလွန်းလို့ အိပ်ယာဘေးနား ထားအိပ်တယ်။ လေသန့်ပေးတဲ့ snake plant ထပ်ဝယ်ထားတယ်။ Golden Photos အရွက်နုလေးတွေထွက်လာရင် ပျော်နေတာ ခုပြန်ညှိုးနေပြန်ပြီ။ အပင်တွေမှာလည်း သူတို့ကြိုက်တဲ့နေရာ၊ မကြိုက်တဲ့နေရာရှိတယ်။ ကြိုက်တဲ့နေရာဆို ရွက်နုတွေဝေလို့ မကြိုက်တဲ့နေရာဆိုရင် အရွက်ကို ညှိုးနေတော့တာ။ အပင်ကို သတိထားကြည့်တဲ့သူဆိုရင်သိတယ်။ အိမ်တွင်းအိမ်ပြင် သစ်ပင်လေးတွေနဲ့ စိမ်းလန်းပြီး ပန်းရနံ့လေးတွေနဲ့ မွှေးထုံနေတဲ့အိမ်လို့ စိတ်ကူးယဥ◌်ပေမဲ့ ခုထိတော့ ဝယ်လိုက်၊ စိုက်လိုက်၊ သေလိုက် ဝယ်စိုက်သေ ဖြစ်နေတုန်။